**********

ഉണര്‍വ്വോടെ നിന്നെ നോക്കുകയല്ലേ ഞാന്‍...,

ഉറക്കിലും,

ഓര്‍മയിലും, ഏറ്റവും ആഴമേറിയ സ്വപ്നത്തിലും,

നിന്നെ നോക്കിക്കൊണ്ടിരിക്കുകയല്ലേ ഞാന്‍ ,

പിന്നെ നിന്നെ വിട്ടു പിരിയുവതെങ്ങിനെ?

----------------

ചുമരുകള്‍, തളം, പടവുകള്‍

വിരിച്ചിട്ട കിടക്ക

മടക്കിവെച്ച തുണികള്‍

പാതിയഴിച്ചിട്ട കൊതുകുവല

അടുക്കി വെച്ച പുസ്തകങ്ങള്‍

ഷെല്‍ഫുകള്‍

ഇതിനകത്ത് എവിടെയോ പെട്ടുപോയിടുണ്ട്

വാര്‍ധക്യം പുരണ്ട രണ്ടുപേര്‍.

തുറന്നിട്ട ജനലിലൂടെ ഇടയ്ക്ക്

ചിരിച്ചു മറിഞ്ഞ കാറ്റും വെയിലും മാത്രം

പുറത്ത് കാലം കുതിക്കുന്നതേപ്പറ്റി അടക്കം പറഞ്ഞു

ഒഴുക്ക് കടല്‍ പോലെ ഈ തുരുത്തിനെ വിഴുങ്ങിയേക്കാം.

------------------

ആണോ പെണ്ണോ അല്ല

അമ്മയല്ല, ഭാര്യയല്ല

വെറുമൊരു ശരീരം

അഴുകുന്ന ഒരു തോല്സഞ്ചി

ഇടയ്ക് നേര്‍ത്ത ഒരു ചിറകടി പോലെ...

' അമ്മേ, മകനിതാ മുന്നില്‍...' ആരോ മന്ത്രിച്ചു...

ഓര്‍മ്മകള്‍ കുലുക്കി വിളിച്ചപോലെ ദേഹം വിറച്ചു

ഒന്ന് മുന്നോട്ടാഞ്ഞു.

'കണ്ണ്‌ തുറക്കു', മകന്‍ വിളിച്ചു,

അപ്പോള്‍ മിഴിഞ്ഞ കണ്ണുകള്‍ ശുന്യം ,

കൃഷ്ണമണികള്‍ക്ക് മീതെ വെളുത്ത തിരശ്ശീല ,

നോട്ടമണഞ്ഞ കണ്ണുകള്‍

മുറിയിലൂടെ നീന്തി,

ആളില്ലാ വഞ്ചി പോലെ

കുറെ നേരം .

-------------- -----

ഈ മഴ എത്ര വെയിലാ കൊള്ളുന്നത്‌ !

-------------------------------------------

ഉച്ചി തൊട്ട്‌ പെരുവിരലറ്റം വരെ
കടുംപിടുത്തം ,
ഒന്നയച്ചു വിടാന്‍ കാലമായല്ലോ,
ചൂലും കോരികയുമായി പുറപ്പെട്ടു
ശിരസ്സിന്റെ അരികില്നിന്നു തുടങ്ങി ക്ലീനിംഗ്,
അടിച്ചു തൂത്ത്, പെരുവിരല്‍മൂട്ടില്‍ കൂട്ടിവെച്ചു,
പിന്നെ കോരിയെടുത്തു
ഒരൊറ്റ ഏറ്.
ഇപ്പോഴെന്തു സുഖം...
പാറിപ്പോവാം
എവിടേക്കും , എങ്ങിനെയും, ഏതുനേരവും.

അടുക്കളയിലെ സിമന്റ് തറയില്‍ കിടന്ന് വായിക്കയായിരുന്നു ഞാന്‍,ചില്ലോടിന്റ വെട്ടത്തില്‍,കാല്‍ ചുമരില്‍ ചായ്ച്ച്,മലര്‍ന്ന്.വെളിച്ചം പെട്ടെന്ന് മങ്ങിയപ്പോഴാണത്്,അക്ഷരങ്ങള്‍ ഇത്തിരിപ്പോന്ന ഉറുമ്പുകളെപ്പോലെപിടഞ്ഞെഴുന്നേറ്റു,കുറേ കുഞ്ഞനുറുമ്പുകള്‍ ചേര്‍ന്ന്എന്നെ പൊക്കിയെടുത്ത്, വലിയൊരു പാറ്റയെക്കൊണ്ടുപോവുംപോലെ,ഏറ്റിവലിക്കാന്‍തുടങ്ങി. അനങ്ങാതെകിടക്കെ ഞാനോര്‍ത്തു,ശവഘോഷയാത്രപോലിരിക്കും...
അതാരും കണ്ടില്ല, അതിനാല്‍ ഇതൊന്നുമാരും പറഞ്ഞുകേട്ടില്ല.

ഒറ്റജനല്‍,
അപ്പുറം
രാത്രിയിലേക്ക് കൊഴിയുന്ന പകല്‍
മുല്ലപ്പന്തല്‍,മഞ്ഞകോളാമ്പികള്‍,
നിന്നെയോര്‍മ്മിപ്പിക്കുന്ന
വേദനിപ്പിക്കുന്ന പൂമണം
ഇപ്പുറം,
നീ ഉച്ചരിക്കാന്‍ മറന്ന വാക്കിന്റെ
ബന്ധനസ്ഥ.